سليمة (4)

ترددت والدتها وهي تقول والله يا بنيتي عندي خبر بس .. لم تكد تكمل حديثها حتى رأت ( سليمة ) شاب ناعم ومعه بوكيه ورد يتقدم من السيدة التي تبكي لتقول لحظه يمه ثواني بس .. نهضت من سريرها وتوجهت إلى ذلك الشاب لتقول له .. أنت ولدها .. التفت إليها وهو يرتدي النظارة الشمسية وقد غرق شعره بجل .. ليقول بصوت ناعم ايه فيه شي .. أمسكت ( سليمة ) نظارته وخلعتها بهدوء وهي تقول وشوله نظاره شمسية ليكون الشمس داخله معك وحنا ما ندري ابتسم لدعابتها بسخرية وهو يقول دمك خفيف ها ها .. وضعت النظارة على الطاولة وهي تقول له حتى يدي خفيفه بعد ..

عندها انهالت عليه باللكمات والركب في أرجاء الغرفة ليسقطا على سرير سيدة تعاني من مرض القلب والأطباء حولها يحاولون انعاش قلبها ... سقطا عليها و( سليمة ) تضم قبضتها لتسدد له لكمة في وجهه ولكنه يبعد وتأتي اللكمة في صدر السيدة من جهة القلب لتفز وترجع وتسقط والاطباء يحاولون أبعادهم حتى يستطيعوا انعاشها .. و ( سليمة ) تضم قبضتها وتسدد مرة أخرى والشاب يبعد لتأتي في قلب المرأة التي سرعان ما تحرك مؤشر نبضات القلب بأن قلبها عاد لينبض للحياة ليصرخ الأطباء بصوت واحد والفرحة تعتريهم الله واكبر الله واكبر ..

ولكن ( سليمة ) لم يكن بالها معهم لتمسك بالشاب بكل غضب وهي تقول .. مسوي بتنحاش من لكماتي يا عاق امسكت به من ثوبه ورفعته بقوة ليضرب رأسه سقف المستشفى ومن ثم سقط وهو يصرخ وش فيه ..

وش القصة .. لتجيبه ( سليمة ) واللهاث يقتلها كل هالضرب اللي ضربتك اياه وتسأل وش فيه يا حسوفة ضربي فيك كنت أحسبك عارف ليش أنا اكفخك ، وانهالت عليه بالضرب أكثر وأكثر حتى فقد الوعي وبعدها كتبت في ورقة ( سبب ضربي لك يا كلب عشانك عاق لامك ووالديك يا أمعه حافظ عليهم هذولي راس مالك وزرها كل يوم وإلا قسم بالله أن تشوف شي ما يسرك ) ما إن انتهت من الكتابة حتى وضعت الورقة في جيبه وحملوه طاقم المستشفى ليدخل بعدها الدكتور ( فتحي ) وهو يقول مش معؤول يا ( سليمة ) دي بأت حلبة مصرعه ... اشارت بيدها له في وجهه بأن يصمت لتقول شف يا دكتور مانيب رايقه لك أطلع برى لأخنقك بالسماعة اللي عليك ..

أبتسم لها وهو يقول فكرتيني بأيام شبابي لما كنت بأف في طابور العيش وشاور بإيدي ويقي الواد بتاع العيش قري عشان يديني العيش أبل الكل .. همهمت ( سليمة ) بينها وبين نفسها الله يجيبك يا طولة البال ومن ثم قالت ... شف يا دكتور فتحي إذا تبي تعيش أطلع من هالغرفة هالحين وإلا خليتك تغير مهنتك وتشتغل في الفرن حق العيش .. خرج الدكتور لتقول ( سليمة ) للسيدة العجوز خلاص يا خاله أنا خليت ولدك يجلس عندك في المستشفى تقدرين تشوفينه في أي وقت بس أنت أعرفي كم رقم غرفته ..

عادت إلى السرير ووالدتها جالسة لتقول لها وش القصة يمه تقولين فيه موضوع قولي .. ترددت والدتها لتقول لها الشيخ تقدم لك وفي نفس الوقت تقدم لك واحد ما نعرفه .. قاطعتها ( سليمة ) يعني شلون ما نعرفه مكتوب على وجهه سري للغاية وش قصته .. ترددت والدتها لتقول .. ما أدري يا بنيتي بس يقولون أنه ملحن ومهوب تكانة عندك الثنين وأنت اختاري بينهم ...

شوفي من تختارين وفيه حاجة ثانية .. هنا قاطعها أخوها ( فهد ) بأنه سوف يذهب ليشرب الماء .. لتقول والدتها بصوت خافت ترى أخوك ( فهد ) مهوب يذاكر .. لم تكد تنطق بتلك الكلمة حتى خرجت من الغرفة خلف أخيها ومن ثم عادة بسرعة لتقول لها والدتها وين رحتي يا بنيتي .. لم تكد تنطق بسؤالها حتى دخل فهد وقد لف شاش على رأسه لتقول له والدته وش فيك .. لتجيبها ( سليمة ) أبد كسرت البراده على راسه عشان يعرف يذاكر .. خلاص يمه خليني أفكر وأقولك

* * *

سهرت ( سليمة ) ولم يأتيها النوم طوال الليل تشاهد التلفاز وكذلك الناس في بيوتهم تتابع القناة الاولى وكل دقيقه تتغير البرامج والمسلسلات والافلام وكأنه اصيب بخلل فني دون أن يعلموا بأن ( سليمة ) قد اتصلت على مدير القناة الأولى ورمت عليه كم كلمة تهديد ليقوم بوضع الأفلام لها وهي معه على الخط يقول لها .. هاه الفلم هذا كويس وهي تقول لا شايفته ويقوم بتغييره وهو يسألها طيب هذا .. لتجيبه اعرف نهايته تطلع الأسماء في آخر شي ..

صمت للحظات قبل أن يقول بتردد كل الافلام تطلع أسماء الابطال في آخر شي .. قالت له أنا طفشانه ورني شي جديد .. وأخذ يغير و العجوز بجانب ( سليمة ) تقول لها بصوت هامس قولي له يحط لنا فلم التاي تنك ما قطع ...

أمسكت ( سليمة ) سماعة الهاتف بيدها وهي تجيبها يا خاله باقيلك يومين وتموتين أتقي الله تبين فلم كرتون وإلا أخليه يحط برامج تتكلم عن شد البشرة وأنواع الكريمات اذا تبين نخليه يحط لنا برنامج يتكلم عن ماسك موية الذهب ويجيب وحده تسوي خلطات للوجه زبادي مع خيار ، وحليب نيدو مع موية ورد تنعم وتفتح البشرة ، وحقن البوتكس للي في الجفن وتكبر العيون ، وإلا برنامج يتكلم عن الحمام المغربي وإلا عن ابر الميزوثروبي .. تطلعت إلى عيني العجوز المتسائلة لتقول لها هذي زي الفيتامينات تحقن بها الوجه ويعطي نظارة وللشعر منع التساقط وكذلك للجسم يحرق الدهون وإلا تبين شي للجسم lpg لم تكن نظرة التساؤل في عيني العجوز أقل من الأولى ..

لتقول لها ( سليمة ) هذا جهاز للشد والتنحيف ويشيل السيولاليت .. ضحكت العجوز وهي تقول لها تراك يا بنيتي متصله على القناة الاولى مهوب الالبي سي .. لو قلتي لهم يجيبون برنامج عن هالحاجات بتحرجينهم ما عندهم الا سليمان العيدي وإلا العيسى من تبين يقدم البرنامج فيهم .. تنهدت ( سليمة ) وهي تقول ذكرتيني يوم كنت أنثى قبل ما أكتشف خيانة زوجي السابق الله يرحمه مع الشغالة .. قاطعتها العجوز الله يرحمة ويغفر له كيف مات ...

ترددت (سليمة ) قبل أن تقول أبد بعد ما طلقني جيت في الليل وقطعت فرامل السيارة وطلع مشوار وصدم في صبه وتقلب .. شخصت العجوز بعينيها من شدة الخوف لتستطرد ( سليمة ) وهي تزفر .. كلب وراح لا تحطين في بالك هذا معشر اغلب الرجال طبعهم الخيانه ولو يشوفون علينا زله سوو لنا زحمة حتى لو كان شك ...