مذكرات مليونير(2)

بعد مضي مدة تعادل الإسبوع في ذاك الزمان ( تتكلم عن العصر الحجري أنت ؟

) إذا بوالدتي توقظني في الصباح الباكر
وتخاطبني بصوتٍ حنون .. ( مستر أي ) .. ( مستر أي ) .. قم يالله يله تراك متأخر على المدرسة ..
يالله لا تتأخر زيادة ترى الساعة الحين تسع ( الساعه 9 ولك وجه تقولين لا يتأخر بعد ؟ ) ..

استيقظت ولبست ملابسي ثم خرجت من المنزل فإذا بي أجد أمامي حارسي الشخصي
والمربي الخاص بي ( طفاية ) وفي يده كوب من الحليب الساخن ..
خرجنا معاً واتجهنا للمدرسة و فور وصولنا هناك نزل ( طفاية ) قبلي كي يفتح لي الباب .

عندها سمعت أحد الطلاب وهو يقول لزميلة ساخراً .. شف شف لايفوتك ذا اللي مخلي
السواق ينزل يفتح له الباب .. ناقص بس فرشة حمراء و النشيد الوطني وتحس انك تشوف
حفل استقبال في القناة الأولى ..

أردف زميله ساخراً مني هو الآخر .. خل فتحة الباب على جمب
وشف راس البزر بالله ما يذكرك شكله المثلث بالأهرامات ؟! ..

يضحك زميله على ذبته الماصلة علي ثم يردف .. تصدق أول ما شفت السواق ينزله من السيارة
حسبته مدرس رياضيات جديد عندنا وجالس ينزل عمل هندسي عشان يشرح لنا عليه .

سفهتهم ودخلت لمبنى المدرسة والطلاب في وقت الفسحة .. التفت فإذا بـ ( طفاية )
يمشي بجانبي ومعه حقيبة في يده .. سألته متعجباً : بتدخل معي للمدرسة يا ( طفاية ) ؟؟ ..

يجيبني : أيه يا مستر .. أمك موصيتني ومحرصتني عليك .. وبعدين ترى …..
قاطعته قبل أن ينهي حديثه وقلت : يوووه طفاية .. طفاية .
الحق وش ذا الناس اللي صافين ورى بعض ؟ .. اصبر اصبر لا تقول لي ! .
خلاص عرفت .. أكيد هذا اللي يسمونه ( سرى على مخبز تميس ) .. صح علي ؟؟

الله يا ( طفاية ) من زمان كان ودي اشوف مخبز التميس اللي يقولونه .. بسرعه بسرعه بروح اوقف
جمبهم هناك وانتي تعال صورني عشان أوري الصور لأمي ولأصحابي في الويب سايت حقي .
يضحك ( طفاية ) ثم يرد على استفساري المفعم بالدلاخة : لا لا يا مستر أي ..
هذا طال عمرك المقصف الطلابي .. هنا يبيعون الفطور والحلويات للطلاب اللي في المدرسة .

بعد عدة أيام يتلقى والدي اتصالاً من سكرتيره في الشركة ويخبره أن مدير المدرسة يريد التحدث إليه .
رد عليه والدي وقبل أن يبدأ بالتحدث معه إذا بالمدير يصرخ عليه قائلاً : مشينا أن ولدك يجي للمدرسة
كل يوم ومعه الحارس الشخصي وصرفنا مكتب الإشراف يوم شافوه وقلنا أنه عامل نظافة ..
وتغاضينا عنه وهو يجيب معه اللاب توب والبلاي ستيشن كل يوم للفصل وبرضو مشيناها
على مكتب الإشراف وقلنا أنها وسائل تعليمية للشرح ..

بس كون أن الولد يدور في الفناء المدرسي وهو يدخن سيقار !! .. وكون أنه يشتري كل يوم له
ولزملائه من المقصف ولا يدفع ولا ريال بحجة أن المقصف ما يحاسب ببطاقة الفيزا ؟ ..
هنا نكون وصلنا حدنا عاد ..

واسمح لي أقول لك تعال خذ ولدك من المدرسة فوراً ..
ما عاد بقى الإ نحط في الفناء المدرسي مكينة صراف عشان نرضي ولدك بعد !!

عاد والدي للمنزل فوجدني مرتمياً في حضن والدتي والدموع تنهمر مني .. خاطبني مستفهماً : وش فيك ؟؟
.. لم أستطع أن أرد عليه فلقد كنت متغلقاً من شدة البكاء ..
ثم بادرت والدتي بالكلام : شف يا ( أبو مستر ) المدرسة ذي أبيك بكره تشتريها وتهدم المبنى حقها
وتحط بدالها محل بيع قطع غيار أو مطعم بخاري حتى … أهم شيء ينهد المبنى ما أبي ولدي بكره
إذا مر من عند المدرسة يتذكرها ويتذكر اللي صار له ويتعقد !!

طيب قولوا لي الحين وش اللي صاير ؟؟!! .. كانت تلك هي أخر جملة سمعتها من والدي قبل أن أفقد الوعي
حضنتني والدتي وهي تبكي وقالت : حسبي الله على اللي كان السبب !! ..

أمسك والدي بيدها وقال لها وهو غاضب : وش صاير للولد ؟؟

خاطبته والدتي وهي تمسح دموعها : تخيل اليوم المدير نادى ( مستر أي ) للمكتب حقه وعطاه الملف حقه
وقال له خذه لبيتكم خلاص أنت مفصول ! .. يتنهد والدي ويقول : أيه دريت انه انفصل .
المدير اتصل علي في المكتب اليوم ..

تصرخ والدتي مقاطعةً كلام والدي : ما همني فصله من المدرسة أصلاً ,
اللي قاهرني .. هو طلب المدير من ولدي .. أجل يقول له شل ملفك !! .. أنا ولدي يشيل ملفه ؟؟
وش فايدة العمال الموجودين في المدرسة ؟؟ .. ليه ما يشيلونه عنه ؟؟ وإلا لازم يعقدون الولد يعني

أنا قلت لك من قبل مانبي مدرسة حكومية بس أنت ما اقتنعت وهه هذي هي النتيجة .
من بكرة لازم نشتري أقرب أرض للبيت ونبني فيها مدرسة خاصة عشان يدرس فيها .

1995 ميلادي

في صيف ذاك العام كنت قد انتهيت من دراسة المرحلة الابتدائية في المدرسة الخاصة
التي بناها لي والدي .. وككل صيفية تصيبني الحيرة , إلى أي بلد أسافر ؟؟

وكم أمكث ؟؟

, وماذا اخذ معي ؟؟

.. يووووه تباً لهذه الحيره <<— كلن على همه سرى

قطع بهجتي وتفكيري بالسفر كلام والدي القاسي لي .. قال لي : شف يا مستر أنا أسف
اني بخرب عليك الصيفية بس لازم وأنا ابوك تتعلم وتتعود من الحين ! ..
أبيك تروح تدور لك أرض فاضية في الحارة عشان نبنيها لك مدرسة متوسطه ..
أنا لولا أشغالي والتزاماتي وإلا كان جيت معك بنفسي .. عموماً يالله عشان ما تتأخر
ونتأخر في شراء الأرض وبناءها .. ايه صح نسيت اقول لك يا مستر أي ..
لا تقول لأمك عن الكلام اللي دار بينا .. لو سمحت يعني ( تراه مهوب خايف أبد )

خرجت مكرهاً أنا وحارسي ( طفاية ) وبدأنا نجول في المنطقة بحثاً عن أرضِ مناسبة لبناء المدرسة عليها
.. وبعد بحث متعبٍ وطويل دام حوالي العشر دقائق إذا بنا نرى أرضً مناسبة تماماً , أردنا أن نقف
بقربها كي نسأل أحد المارة عن صاحب الأرض فصادفنا مجموعة من الأولاد الحفاةً قد رفعوا أكمامهم
وطووا بناطيلهم وكانوا يضربون بأقدامهم شيء مستديراً لا أعرف ما هو ؟؟ ..
يا ترى هل هذا هو الحب الذي يتكلم عنه الناس ؟؟

<<— لا عاد تفكر مره ثانية تكفى !

لفت نظري من بين أولائك الأولاد شاب جميل .. ابيض البشرة ,أزرق العينين , أحمر الوجنتين ,
أشقر الشعر .. التفت إلى ( طفاية ) وقلت له : ياخي تشوف القهر .. شف ذا الولد وين ساكن
و وش لابس وما شاء الله شكله زين .. وأنا شف وش راكب ومن أنا ومع ذلك شين ..
بس يالله أكيد ما راح يكون بمثل أخلاقي وشجاعتي وفطنتي وذكائي

.. صح يا ( طفاية ) ؟؟ .. صح أنا أحسن منه ؟؟

تنهد ( طفاية ) ثم قال لي مصرفاً : أحم .. أيه أيه أنت أحسن منه .. إلا وش رأيك يا ( مستر أي )
نروح نسأله عن الأرض ؟؟ .. ابتسمت وقلت له مفهياً : أوكي رح ناده .. ذهب ( طفاية )
إلى الولد وأخبره بأنني أريد التحدث إليه ثم عاد ( طفاية ) إلى السيارة وبصحبته الولد ,
أنزلت نافذة السيارة استعداداً للتخاطب معه وقبل أن أتكلم سقط الولد مغشياً عليه من شدة الضحك
وقال لي : بالله عليك هذا وجهك صدق وإلا لابس قناع ؟؟ لا لا هذا مهوب وجهك , متنكر صح ؟؟ ..

لا أخفيكم بأنني كدت أن أقول للسائق بأن يدهسه بعد خطابه الجارح لي ولكن طيبتي
وكرمي وشجاعتي منعتني من فعل مثل هذا العمل المشين .. ما قلت لكم إني طيب

؟؟

ابتسمت في وجه الولد وقلت له : هههههههههه لا هذا وجهي للأسف .
لو معجبك علمني الحين أسوي عملية تبديل وجوه وعلى حسابي بعد , هاه وش قلت ؟؟
إلا ما قلت لي وش اسمك ؟؟ ..

تنهد الولد وقال لي بصوتٍ واطي : اسمي ( برّايه ) ..
ضحكت بشدة حتى كاد نفسي أن ينقطع وقلت له وأنا أحاول أن أتمالك نفسي : وشو .. وشو
.. ( برّاية ) ؟؟ هذا اسمك الحين بالله ؟.. اصبر اصبر لا تقول لي .
أكيد مولود في مكتبة خدمات طالب وأسم امك ( منقلة ) ..

صح ؟؟ؤ

Admin

» مذكرات مليونير(1)
» مذكرات بنقالي عاش في السعودية