فجر عارفة زين إنه دلال عنيدة.. و كتومة.. و عندها عزة نفس بشكل رهيب..لدرجة أنها كانت تعتقد إذا فضفضت لأحد..بتهين كرامتها...بس فجر بعد كان عندها الأسلوب الي يخلي دلال تقول لها كل شي عن دون الكل... فجر قربت أكثر من دلال و حطت يدها على جتفها..جربت فمها من أذن دلال و همست في إذنها...
فجر: شدعوة بو الشباب..بتخش عني طلول؟!
دلال: آه يا فجر ما أدري شصادني...
فجر: خير إن شاء الله؟
دلال: أمس حسيت بإحساس غريب..عمري ما حسيته من قبل...و ياتني أفكار غريبة...عمري ما فكرت فيها...
فجر: ليش..خير إن شاء الله ؟؟ شصاير؟؟؟
دلال: كنت مع فيصل و خالد...و فيصل حط يده على جتفي.. و مرة وحدة حب راسي!!
فجر(تحاول تخفي تفاجؤها..) : انزين؟؟؟(تكلم روحها: مثل ما توقعت!!!)
دلال: شنو انزين؟؟ ما ادري يا فجر شصادني...حسيت بإحساس عمري ما حسيته.. و بقشعريرة في كل جسمي... و حاولت أنسي روحي السالفة فطلعت مع وله..و بدل ما أرتاح..تعبت نفسيتي أكثرمن سؤال سأتني إياه وله....
فجر: شنو سألتج؟؟؟
دلال: نهاية علاقتنا شنو؟؟؟... لوين بنوصل؟؟؟
فجر: و ليش ما قلتيلها؟؟؟
دلال: ما قدرت يا فجر..ما قدرت!!
فجر: ليش..إنت خايفة؟؟؟
دلال: شنو؟؟ لا..بس..
فجر: بس شنو..لا يكون بتراجعين دلال؟؟؟
دلال: لا.....
فجر: دلال احنا ما نقدر نتراجع..خلاص..دلول الريايل الكفو ما يتراجعون...
دلال: انا ما ابي اتراجع..بس...
فجر: بس شنو؟؟ لا يكون ندمانة دلول؟؟؟
دلال: لا مو ندمانة..
في هذي اللحظة رن تلفون فجر..و كان المتصل حنين...
فجر: ألو..هلا هلا حمود..اي انا عندها..شنو؟؟ احم احم..اوكي..باي..
و بسرعة دزت مسج لحنين ..كان هاي مضمونها:
(( حمود لازم نطلع انا و انت و طلول طلعة شي اليوم لانه شكله الحبل بدا يرخي..كول مي))
فجر: ها دلال نرجع لموضوعنا..تدرين المسكينة وله تحاتيج من الصبح.. و عبالها انها مزعلتج؟؟
دلال ما مداها ترد على فجر..لانه تلفونها رن.. و كانت حمود حسب الاتفاق...
فجر: حمود و بعدين معاك..تراك سندرتني!!.......... صج انه عليك افكار..يالخطير..لحظة بسال طلول.....طلول شرايك نطلع انا و انت و حمود..نقز و نغير جو!!!؟؟؟
دلال: لا لا ما لي خلق!!
فجر: لا يكون ما تبي عشان شي ثاني؟؟؟
دلال: شنو؟ لا! لا! اوكي خلاص..نطلع!!
فجر: اي جذي!! اوكي حمود..ألحين نييك!
************************************************** ******************************
******************** ************************************
وفي مكان ثاني.. تحديدا في كوفي شوب صغير وهادي.. كانت رنيم مع حبيبها جاسم..قاعدين يسولفون...
رنيم: والله يا جاسم أحاول معاها.. اتقرب منها.. اهتم فيها... بس ما في فايدة!!
جاسم: صح الي تقولينه حياتي ... بس وله حصلت الاهتمام الي محتاجته من مكان ثاني.. في نااس غير ملو الفراغ العاطفي الي كان عندها... و الكلام الي تقولينه لها ما يأثر فيها.. ما يدخل قلبها!!!
رنيم: و الحل يا جاسم؟ خلا ص .. أخليها اتضيع؟؟
جاسم: لا ما بتضيع.. خل ايمانج بالله قوي!! أول خطوة أنها تبعد عنها!!
رنيم: بس شلون؟؟ جاسم انت ما تعرف دلال بالنسبة لها شنو؟؟ اهي الهوا الي وله تتنفسه!!
جاسم: لهالدرجة؟؟
رنيم: و أكثر يا جاسم!!
جاسم: انزين.. انتي قلتي انه هذي الي اسمها دلال في توجيهي..يعني خلاص ما بقى إلا هالسنة و تتخرج!! و جذي وله بتفتك منها!!
رنيم: سنة كاملة يا جاسم..سنة ممكن يصير فيها وايد أشياء!!
صار صمت شوي... رنيم تفكر باختها... جاسم يفكر.. مثل شنو ( الأِشياء الي ممكن تصير؟؟) فجأة رنيم قطعت الصمت...
رنيم: جاسم أبي اقولك على شي و يا ليت ما تفهمني غلط!
جاسم: خير رنيم....
رنيم: جاسم..لا تطرش أهلك الحين.. أجلها شوي لحتى ما القا صرفة ويا وله!
جاسم: افا رنيم...لا تقولين!!
رنيم: جاسم انا ما قدر أتزوج الحين..يا جاسم أنا إذا طلعت من البيت الحين وله بتضيع... محد حاس فيها غيري يا جاسم...
جاسم: رنيم على الاقل نملج...
رنيم: نملج جم؟ شهر ؟ اثنين؟ ثلاث؟ انته أكثر واحد فاهم ظروفي.. و عمي جابر لا يمكن يوافق على الملجة الطويلة..و عمامي كلهم أكيد راح يوقفون معاه ضدنا..من يوم ما توفى أبوي الله يرحمه.. و أهمه حاطين علينا... و لا كأنا عيال أخوهم..
جاسم: الله يرحمه..ما عليج يا رنيم..بياخذون جزاهم في الآخرة!!
رنيم: المهم..********دة الكلام اني ما اقدر اتزوج يا جاسم قبل ما اتطمن على وله..
جاسم: انزين رنيم..انتي عاجبج الوضع جذي؟؟ رنيم انا خايف عليج...تخيلي احد تعرفينه جافج معاي هني..شنو راح يقول عنج؟؟ تخيلي لو وصل كلام لعمامج..شنو راح يسوون فيج؟؟؟ رنيم والله انا خايف عليج!!!
رنيم:....................
جاسم: رنيم... وين رحتي؟؟
رنيم: ما ادري يا جاسم.. معقولة في زمنا هذي .. في ناس بشهامتك؟؟
جاسم: رنيم.. انا احبج..والي اسويه ابسط شي يقدر الواحد يسويه لشخص يحبه و يعزه...
رنيم: ......................
************************************************** ******************************
******************** ********************************************
خلونا نروح للسنتر...خلونا نجوف دلال و حنين و فجر شقاعدين يسوون بالضبط..يقزون على قولتهم!!!
اهمه الحين في كوفي شوب قاعدين... و يخزون البنات...الي رايح و الي ياي.. و مغازل و تنغز...
فجر: ايا على الأحمر ذبحني!!!
كان في بنت لابسة بدي أحمر..طافت من جدامهم..البنت التفت على فجر و طالعتها بنظرة احتقار.. و مشت...
حنين: بووووووو فهود عطتك بنظرة.....
فجر( و هي تحاول تبين انه عادي) : فديت العيون بس..وربي هالنظرة على قلبي أحلى من العسل!!!!!
دلال: هاهاي.. أول مرة أجوف أحد يهزأونه و يستانس...
فجر: دام حلويين .. مو مهم!!
البنت ردت التفت عليهم مرة ثانية... و عطتهم بنظرة و مشت...
حنين: شتبي هذي؟ بقوم بكفخها الحين..
دلال: يه النظرة مو لك ... شعليك انت؟
حنين و فجر يضحكون.. دلال سرحت شوي...
حنين: طلول وين وصلت؟
دلال: هلا...و لا مكان!
فجر: حمود..ما عليك منه... دواه عندي!!
و طلعت شي من مخباها.. و قدمته لدلال و حنين...
دلال: فهود.. من و ين يبته؟!!
فجر: هاهاي... شريته!
حنين: عطيني وحدة...
دلال: اي وانا بعد..
حنين: صج انك خطير فهود!!
فجر: بعد شنو يبه!!! نبي نظبط الوضع..ولا شلون؟
دلال: آآآآه...بو صج راحة...عليك حركات فهود....
اذا ليحين ما عرفتو شنو الي مع فجر...فهو جقاير....و فعلا قعدوا يدخنون ثلاثتهم...
دلال: بو صج الشعور فن!!!
فجر: شعبالك يبه؟؟
حنين: كح..كح..بل شنو ذي؟!
فجر(وهي صاكة ظروسها) : بالعدال يبه.. فظحتنا حمود..شكلك كلش مو بروفيشينال!!!!
دلال: الاخ رقيق!!
فجر: قصدك بناتي!!
حنين: مالت عليكم!!
دلال و فجر يضحكون من قلب!!!
عقب هذي الطلعة...دلال ما عندها كلام ثاني.. وكل الي صار في اليومين الي مظوا.. تلاشى مثل السراب.. حسافة يا دلال.. في الوقت المناسب ما لقيتي الشخص الي يسحبج لبر الأمان.. بس لقيتي من يغرقج و يسحبج للحضيض... و يخليج تغوصي في الوحل أكثر و أكثر... الفصول الياية فيها أحداث وايد... في أشياء كثيرة راخ تتغير.. للأحسن يمكن.. للأسوأ...الله أعلم!!!!
الإثنين يونيو 22, 2009 3:01 am
